موضوع: اساليب للعقاب الإثنين أكتوبر 15, 2007 10:04 am
موضوعنا عن التربية هالبحر الكبير اللي نحاول قد ما نقدر اننا نختار منه أفضل الدرر يمكن تستغربون لإني اخترت العقاب و ليس الثواب لكن الثواب مقدور عليه اذا سوى طفلك أي شي حلو تقدرين تكافئينه بالشيء اللي هو يحبه و ما في ام ما تعرف وش يحب طفلها
لكن العقاب تحتارين فيه أحيانا طبعا كلامي هنا بعيد تماما عن الضرب لأن العقاب اساليبه كثيرة
وهنا في هالموضوع يا ليت نتشارك في الأساليب اللي نتخذها مع أطفالنا للحصول على أفضل النتائج
في البداية راح أبدأ ببعض التصرفات اللي لاحظتها في أطفالي و ما كانت معجبتني و طريقة علاجها
* نبدأ بإبني عمره 8 سنوات كانت ملابسه بسرعه تتوسخ اذا لبس كم ساعه و يغير ايش كان السبب انه ما يراعي وقت الأكل مثلا في الغداء ملابسه كان لابد تتعدم بالسلطه أو الإيدام في العشاء آثار الكتشب و العصير لازم تكون موجوده على ملابسه اذا شرب عصير اذا أكل فاكهه دايما يحوس عمره جربت معه كل الطرق منعت التلفزيون وقت الأكل حتى ينتبه لأكله عاقبته انه يآكل في المطبخ حتى يتعلم ما فيه فايده
مره وبعد ما انتهينا من العشاء كان كالعادة حايس عمره بالكاتشب كلمته قلت له يا مصعب شبعت يا ماما قال : إيه قلت له تعال معي وغير ملابسك ، طبعا غير ملابسه لكن ملابسه الوسخه ما راحت سلة الملابس كالعادة لأ قلت له انا نبهتك كثير على طريقة أكلك وما فيه فايده و انت يا ماما كبير ما انت صغير حتى تحوس عمرك بهالشكل و انا تعبت من الغسيل وراك كل يوم عشر مرات خلاص المره هاذي انت تغسل ملابسك قال يا ماما حطيها في الغساله وهي تغسلها >>>>> بصراحه ورطني بهالرد لكن قلت له الغساله انا الآن استخدمها و اغسل ملابس بابا
وجهزت له طشت مويه وحطيت له التايد وقلت له هيا إبدأ بسم الله أول شيء رفض و بعد ثواني أعجبته الطريقه و كان ينادي اخوانه يجون يشوفون كيف يغسل ملابسه لكن مع الوقت اخوانه طفشوا وراحوا و تركوه لحاله يغسل و كل ما ناداني أجي أشوف ملابسه اقول له لسع كمان باقي ما نظفت حتى تعب و يوم نظفها و خلاها تلمع وقتها اخذتها منه وساعدته في تشطيفها و حطيتها في النشافه و بعد قلت له ينشرها على المنشر ثاني يوم وهو رايح المدرسه أخذها من المنشر و كويتها له و لبسها ما تصدقون قد ايش كان حريص على نفسه و على ملابسه حتى المويه ما يبغاها تنقط عليه ........... بصراحه فاجأني ومن بعدها صار يحاسب على نفسه و على ملابسه طبعا هو ما غسل ملابسه غير مرتين لكن انا حذرته لو في يوم وسخ ملابسه بسبب اهماله وعدم مراعاته للأكل هو اللي راح يغسلها
هذا عقاب استخدمته مع ابني وجاب نتيجه ممتازة معه طبعا راح اكمل معاكم ببعض الأساليب اللي جربتها و انتم كمان شاركونا و خلونا نستفيد من بعض وش هو العقاب المناسب اللي استخدمتيه مع اطفالك وجاب نتيجه
زائر زائر
موضوع: رد: اساليب للعقاب الثلاثاء أكتوبر 16, 2007 2:46 pm
حلو كتير الموضوع
مشكورة كتير هذا العمل القيم المفيد
تحيتي
زائر زائر
موضوع: رد: اساليب للعقاب الثلاثاء ديسمبر 18, 2007 7:05 pm
الإثنين يونيو 08, 2009 1:19 am من طرف محمد
موضوع: اساليب للعقاب 
